سورہ المدثر اردو ترجمہ کے ساتھ: عربی متن اور آڈیو

1

يَـٰٓأَيُّهَا ٱلْمُدَّثِّرُ

اے کپڑا اوڑھنے والے.^[1]

حواشی

[1] سب سے پہلے جو وحی نازل ہوئی وہ «اقْرَأْ بِاسْمِ رَبِّكَ الَّذِي خَلَقَ» ہے اس کے بعد وحی میں وقفہ ہوگیا اور نبی (صلى الله عليه وسلم) سخت مضطرب اور پریشان رہتے۔ ایک روز اچانک پھر وہی فرشتہ، جو غار حرا میں پہلی مرتبہ وحی لے کر آیا تھا۔ آپ نے دیکھا کہ آسمان و زمین کے درمیان ایک کرسی پر بیٹھا ہے، جس سے آپ پر ایک خوف سا طاری ہوگیا اور گھر جاکر گھر والوں سے کہا کہ مجھے کوئی کپڑا اوڑھا دو، مجھے کپڑا اوڑھا دو۔ چنانچہ انہوں نے آپ کے جسم پر ایک کپڑا ڈال دیا، اسی حالت میں وحی نازل ہوئی۔ (صحيح البخاري، ومسلم، سورة المدثر وكتاب الإيمان) اس اعتبار سے یہ دوسری وحی اور احکام کے حساب سے پہلی وحی ہے۔

لنک 74:1

2

قُمْ فَأَنذِرْ

کھڑا ہوجا اور آگاه کردے.^[1]

حواشی

[1] یعنی اہل مکہ کو ڈرا، اگر وہ ایمان نہ لائیں۔

لنک 74:2

3

وَرَبَّكَ فَكَبِّرْ

اور اپنے رب ہی کی بڑائیاں بیان کر.

لنک 74:3

4

وَثِيَابَكَ فَطَهِّرْ

اپنے کپڑوں کو پاک رکھا کر.^[1]

حواشی

[1] یعنی قلب اور نیت کے ساتھ کپڑے بھی پاک رکھ۔ یہ حکم اس لئے دیا گیا کہ مشرکین مکہ طہارت کا اہتمام نہیں کرتے تھے۔

لنک 74:4

5

وَٱلرُّجْزَ فَٱهْجُرْ

ناپاکی کو چھوڑ دے.^[1]

حواشی

[1] یعنی بتوں کی عبادت چھوڑ دے۔ یہ دراصل لوگوں کو آپ کے ذریعے سے حکم دیا جا رہا ہے۔

لنک 74:5

6

وَلَا تَمْنُن تَسْتَكْثِرُ

اور احسان کرکے زیاده لینے کی خواہش نہ کر.^[1]

حواشی

[1] یعنی احسان کرکے یہ خواہش نہ کر کہ بدلے میں اس سے زیادہ ملے گا۔

لنک 74:6

7

وَلِرَبِّكَ فَٱصْبِرْ

اور اپنے رب کی راه میں صبر کر.

لنک 74:7

8

فَإِذَا نُقِرَ فِى ٱلنَّاقُورِ

پس جب کہ صور میں پھونک ماری جائے گی.

لنک 74:8

9

فَذَٰلِكَ يَوْمَئِذٍۢ يَوْمٌ عَسِيرٌ

تو وه دن بڑا سخت دن ہوگا.

لنک 74:9

10

عَلَى ٱلْكَـٰفِرِينَ غَيْرُ يَسِيرٍۢ

جو کافروں پر آسان نہ ہوگا.^[1]

حواشی

[1] یعنی قیامت کا دن کافروں پر بھاری ہوگا کیونکہ اس روز کفر کا نتیجہ انہیں بھگتنا ہوگا، جو جرم وہ دنیا میں کرتے رہے ہونگے۔

لنک 74:10

11

ذَرْنِى وَمَنْ خَلَقْتُ وَحِيدًۭا

مجھے اور اسے چھوڑ دے جسے میں نے اکیلا پیدا کیا ہے.^[1]

حواشی

[1] یہ کلمہ وعید و تہدید ہے کہ اسے، جسے میں نے ماں کے پیٹ میں اکیلا پیدا کیا، اس کے پاس مال تھا نہ اولاد، اور مجھے اکیلا چھوڑ دو، یعنی میں خود ہی اس سے نمٹ لوں گا، کہتے ہیں کہ یہ ولید بن مغیرہ کی طرف اشارہ ہے۔ یہ کفر و طغیان میں بہت بڑھا ہوا تھا، اس لئے اس کا خصوصی طور پر ذکر کیا ہے۔ واللہ عالم۔

لنک 74:11

12

وَجَعَلْتُ لَهُۥ مَالًۭا مَّمْدُودًۭا

اور اسے بہت سا مال دے رکھا ہے.

لنک 74:12

13

وَبَنِينَ شُهُودًۭا

اور حاضر باش فرزند بھی.^[1]

حواشی

[1] اسے اللہ نے اولاد سے نوازا تھا اور وہ ہر وقت اس کے پاس ہی رہتے تھے، گھر میں دولت کی فروانی تھی، اس لئے بیٹوں کو تجارت و کاروبار کے لئے باہر جانے کی ضرورت پیش نہیں آتی تھی بعض کہتے ہیں کہ اس کے تین بیٹے مسلمان ہوگئے تھے، خالد، ہشام اور ولید بن ولید (فتح القدیر)

لنک 74:13

14

وَمَهَّدتُّ لَهُۥ تَمْهِيدًۭا

اور میں نے اسے بہت کچھ کشادگی دے رکھی ہے.^[1]

حواشی

[1] یعنی مال و دولت میں ریاست و سرداری میں اور درازی عمر میں۔

لنک 74:14

15

ثُمَّ يَطْمَعُ أَنْ أَزِيدَ

پھر بھی اس کی چاہت ہے کہ میں اسے اور زیاده دوں.^[1]

حواشی

[1] یعنی کفرو معصیت کے باوجود، اس کی خواہش ہے کہ میں اسے زیادہ دوں۔

لنک 74:15

16

كَلَّآ ۖ إِنَّهُۥ كَانَ لِـَٔايَـٰتِنَا عَنِيدًۭا

نہیں نہیں، ^[1] وه ہماری آیتوں کا مخالف ہے.^[2]

حواشی

[1] یعنی میں اسے زیادہ نہیں دونگا۔ [2] یہ کلا کی علت ہے۔ عنید اس شخص کو کہتے ہیں جو جاننے کے باوجود حق کی مخالفت کرے اور اس کو رد کرے۔

لنک 74:16

17

سَأُرْهِقُهُۥ صَعُودًا

عنقریب میں اسے ایک سخت چڑھائی چڑھاؤں گا.^[1]

حواشی

[1] یعنی ایسے عذاب میں مبتلا کروں گا جس کا برداشت کرنا نہایت سخت ہوگا، بعض کہتے ہیں، جہنم میں آگ کا پہاڑ ہوگا جس پر اس کو چڑھایا جائے گا۔ ارھاق کے معنی ہیں۔ انسان پر بھاری چیز لاد دینا۔ (فتح القدیر)

لنک 74:17

18

إِنَّهُۥ فَكَّرَ وَقَدَّرَ

اس نے غور کرکے تجویز کی.^[1]

حواشی

[1] یعنی قرآن اور نبی (صلى الله عليه وسلم) کا پیغام سن کر، اس نے اس امر پر غور کیا کہ میں اس کا جواب دوں؟ اور اپنے جی میں اس نے وہ تیار کیا۔

لنک 74:18

19

فَقُتِلَ كَيْفَ قَدَّرَ

اسے ہلاکت ہو کیسی (تجویز) سوچی؟

لنک 74:19

20

ثُمَّ قُتِلَ كَيْفَ قَدَّرَ

وه پھر غارت ہو کس طرح اندازه کیا.^[1]

حواشی

[1] یہ اس کے حق میں بد دعائیہ کلمے ہیں، کہ ہلاک ہو، مارا جائے، کیا بات اس نے سوچی ہے؟

لنک 74:20

21

ثُمَّ نَظَرَ

اس نے پھر دیکھا.^[1]

حواشی

[1] یعنی پھر غور کیا کہ قرآن کا رو کس طرح ممکن ہے۔

لنک 74:21

22

ثُمَّ عَبَسَ وَبَسَرَ

پھر تیوری چڑھائی اور منھ بنایا.^[1]

حواشی

[1] یعنی جواب سوچتے وقت چہرے کی سلوٹیں بدلیں، اور منہ بسورا، جیسا کہ عمومًا کسی مشکل بات پر غور کرتے وقت آدمی ایسا کرتا ہے۔

لنک 74:22

23

ثُمَّ أَدْبَرَ وَٱسْتَكْبَرَ

پھر پیچھے ہٹ گیا اور غرور کیا.^[1]

حواشی

[1] یعنی حق سے اعرض کیا اور ایمان لانے سے تکبر کیا۔

لنک 74:23

24

فَقَالَ إِنْ هَـٰذَآ إِلَّا سِحْرٌۭ يُؤْثَرُ

اور کہنے لگا تو یہ صرف جادو ہے جو نقل کیا جاتا ہے.^[1]

حواشی

[1] یعنی کسی سے یہ سیکھ آیا ہے اور وہاں سے نقل کر لایا ہے اور دعویٰ کر دیا کہ اللہ کا نازل کردہ ہے۔

لنک 74:24

25

إِنْ هَـٰذَآ إِلَّا قَوْلُ ٱلْبَشَرِ

سوائے انسانی کلام کے کچھ بھی نہیں ہے.

لنک 74:25

26

سَأُصْلِيهِ سَقَرَ

میں عنقریب اسے دوزخ میں ڈالوں گا.

لنک 74:26

27

وَمَآ أَدْرَىٰكَ مَا سَقَرُ

اور تجھے کیا خبر کہ دوزخ کیا چیز ہے؟^[1]

حواشی

[1] دوزخ کے ناموں یا درجات ایک کا نام سَقَرُ بھی ہے۔

لنک 74:27

28

لَا تُبْقِى وَلَا تَذَرُ

نہ وه باقی رکھتی ہے نہ چھوڑتی ہے.^[1]

حواشی

[1] ان کے جسموں پر گوشت چھوڑے گی نہ ہڈی، یا مطلب ہے جہنمیوں کو زندہ چھوڑے گی نہ مردہ'لا یموت فیھا و لا یحیٰ

لنک 74:28

29

لَوَّاحَةٌۭ لِّلْبَشَرِ

کھال کو جھلسا دیتی ہے.

لنک 74:29

30

عَلَيْهَا تِسْعَةَ عَشَرَ

اور اس میں انیس (فرشتے مقرر) ہیں.^[1]

حواشی

[1] یعنی جہنم پر بطور دربان ١٩ فرشتے مقرر ہیں

لنک 74:30

31

وَمَا جَعَلْنَآ أَصْحَـٰبَ ٱلنَّارِ إِلَّا مَلَـٰٓئِكَةًۭ ۙ وَمَا جَعَلْنَا عِدَّتَهُمْ إِلَّا فِتْنَةًۭ لِّلَّذِينَ كَفَرُوا۟ لِيَسْتَيْقِنَ ٱلَّذِينَ أُوتُوا۟ ٱلْكِتَـٰبَ وَيَزْدَادَ ٱلَّذِينَ ءَامَنُوٓا۟ إِيمَـٰنًۭا ۙ وَلَا يَرْتَابَ ٱلَّذِينَ أُوتُوا۟ ٱلْكِتَـٰبَ وَٱلْمُؤْمِنُونَ ۙ وَلِيَقُولَ ٱلَّذِينَ فِى قُلُوبِهِم مَّرَضٌۭ وَٱلْكَـٰفِرُونَ مَاذَآ أَرَادَ ٱللَّهُ بِهَـٰذَا مَثَلًۭا ۚ كَذَٰلِكَ يُضِلُّ ٱللَّهُ مَن يَشَآءُ وَيَهْدِى مَن يَشَآءُ ۚ وَمَا يَعْلَمُ جُنُودَ رَبِّكَ إِلَّا هُوَ ۚ وَمَا هِىَ إِلَّا ذِكْرَىٰ لِلْبَشَرِ

ہم نے دوزخ کے داروغے صرف فرشتے رکھے ہیں۔ اور ہم نے ان کی تعداد صرف کافروں کی آزمائش کے لیے مقرر کی ہے^[1] تاکہ اہل کتاب یقین کرلیں^[2]، اوراہل ایمان کے ایمان میں اضافہ ہو جائے^[3] اور اہل کتاب اور اہل ایمان شک نہ کریں اور جن کے دلوں میں بیماری ہے وه اور کافر کہیں کہ اس بیان سے اللہ تعالیٰ کی کیا مراد ہے^[4]؟ اسی طرح اللہ تعالیٰ جسے چاہتا ہے گمراه کرتا ہے اور جسے چاہتا ہے ہدایت دیتا ہے^[5]۔ تیرے رب کے لشکروں کو اس کے سوا کوئی نہیں جانتا^[6]، یہ تو کل بنی آدم کے لیے سراسر پند ونصیحت ہے.^[7]

حواشی

[1] یہ مشرکین قریش کا رد ہے، جب جہنم کے دروغوں کا اللہ نے ذکر فرمایا تو ابو جہل نے جماعت قریش کو خطاب کرتے ہوئے کہا کہ کیا تم میں سے ہر دس آدمیوں کا گروپ، ایک ایک فرشتے کے لئے کافی نہیں ہوگا، بعض کہتے ہیں کہ کالدہ نامی شخص نے اپنی طاقت پر بڑا گھمنڈ تھا، کہا، تم سب صرف دو فرشتے سنبھال لینا، ١٧ فرشتوں کو تو میں اکیلا ہی کافی ہوں۔ کہتے ہیں اس نے رسول اللہ (صلى الله عليه وسلم) کو کشتی کا بھی کئی مرتبہ چلینج دیا اور ہر مرتبہ شکست کھائی مگر ایمان نہیں لایا، کہتے ہیں اس کے علاوہ رکانہ بن عبد یزید کے ساتھ بھی آپ (صلى الله عليه وسلم) نے کشتی لڑی تھی لیکن وہ شکست کھا کر مسلمان ہوگئے تھے (ابن کثیر) مطلب یہ کہ یہ تعداد بھی ان کے مذاق یا آزمائش کا سبب بن گئی۔ [2] یعنی جان لیں کہ رسول برحق ہے اور اس نے وہی بات کی ہے جو پچھلی کتابوں میں بھی درج ہے۔ [3] کہ اہل کتاب نے ان کے پیغمبر کی بات کی تصدیق کی ہے ۔ [4] بیمار دلوں سے مراد منافقین ہیں یا پھر وہ جن کے دلوں میں شکوک تھے کیونکہ مکہ میں منافقین نہیں تھے۔ یعنی یہ پوچھیں گے کہ اس تعداد کو یہاں ذکر کرنے میں اللہ کی کیا حکمت ہے؟ [5] یعنی گذشتہ گمراہی کی طرح جسے چاہتا ہے گمراہ اور جسے چاہتا ہے، راہ یاب کر دیتا ہے، اس میں حکمت بالغہ ہوتی ہے اسے صرف اللہ ہی جانتا ہے۔ [6] یعنی کفار و مشرکین سمجھتے ہیں کہ جہنم میں 19 فرشتے ہی تو ہیں، جن پر قابو پانا کون سا مشکل کام ہے؟ لیکن ان کو معلوم نہیں کہ رب کے لشکر تو اتنے ہیں جنہیں اللہ کے سوا کوئی نہیں جانتا ہی نہیں۔ صرف فرشتے ہی اتنی تعداد میں ہیں کہ 70 ہزار فرشتے روزانہ اللہ کی عبادت کے لئے بیت المعمور میں داخل ہوتے ہیں، پھر قیامت تک ان کی باری نہیں آئے گی۔ (صحیح بخاری) [7] یعنی یہ جہنم اور اس پر مقرر فرشتے، انسانوں کی پند و نصیحت کے لئے ہیں کہ شاید وہ نافرمانیوں سے باز آجائیں۔

لنک 74:31

32

كَلَّا وَٱلْقَمَرِ

سچ کہتا ہوں^[1] قسم ہے چاند کی.

حواشی

[1] کلا یہ اہل مکہ کے خیالات کی نفی ہے یعنی جو وہ سمجھتے ہیں کہ ہم فرشتوں کو مغلوب کر لیں گے ہر گز ایسا نہیں ہوگا۔

لنک 74:32

33

وَٱلَّيْلِ إِذْ أَدْبَرَ

اور رات کی جب وه پیچھے ہٹے.

لنک 74:33

34

وَٱلصُّبْحِ إِذَآ أَسْفَرَ

اور صبح کی جب کہ روشن ہو جائے.

لنک 74:34

35

إِنَّهَا لَإِحْدَى ٱلْكُبَرِ

کہ (یقیناً وه جہنم) بڑی چیزوں میں سے ایک ہے.^[1]

حواشی

[1] یہ جواب قسم ہے کُبَر، کُبْرَیٰ کی جمع ہے تین نہایت اہم چیزوں کی قسموں کے بعد اللہ نے جہنم کی بڑائی اور ہولناکی کو بیان کیا ہے جس سے اس کی بڑائی میں کوئی شک نہیں رہتا۔

لنک 74:35

36

نَذِيرًۭا لِّلْبَشَرِ

بنی آدم کو ڈرانے والی.

لنک 74:36

37

لِمَن شَآءَ مِنكُمْ أَن يَتَقَدَّمَ أَوْ يَتَأَخَّرَ

(یعنی) اسے^[1] جو تم میں سے آگے بڑھنا چاہے یا پیچھے ہٹنا چاہے.^[2]

حواشی

[1] یعنی یہ جہنم ڈرانے والی ہے یا نذیر سے مراد نبی کریم (صلى الله عليه وسلم) ہیں یا قرآن بھی اپنے بیان کردہ وعد و وعید کے اعتبار سے انسانوں کے لئے نذیر ہے۔ [2] یعنی ایمان واطاعت میں آگے بڑھنا چاہیے یا اس سے پیچھے ہٹنا چاہیے مطلب ہے کہ انداز ہر ایک کے لیے ہے جو ایمان لائے یا کفر کرے۔

لنک 74:37

38

كُلُّ نَفْسٍۭ بِمَا كَسَبَتْ رَهِينَةٌ

ہر شخص اپنے اعمال کے بدلے میں گروی ہے.^[1]

حواشی

[1] رہن گروی کو کہتے ہیں یعنی ہر شخص اپنے عمل کا گروی ہے، وہ عمل اسے عذاب سے چھڑا لے گا، (اگر نیک ہوگا) یا ہلاک کروا دے گا۔ (اگر برا ہے)

لنک 74:38

39

إِلَّآ أَصْحَـٰبَ ٱلْيَمِينِ

مگر دائیں ہاتھ والے.^[1]

حواشی

[1] یعنی وہ اپنے گناہوں کے اسیر نہیں ہوں گے بلکہ اپنے نیک اعمال کی وجہ سے آزاد ہونگے۔

لنک 74:39

40

فِى جَنَّـٰتٍۢ يَتَسَآءَلُونَ

کہ وه بہشتوں میں (بیٹھے ہوئے) گناه گاروں سے.

لنک 74:40

41

عَنِ ٱلْمُجْرِمِينَ

سوال کرتے ہوں گے.^[1]

حواشی

[1] فی الجنات،اصحاب الیمین سے غال ہےاہل جنت بالاخانوں میں بیٹھے، جہنمیوں سے سوال کریں گے۔

لنک 74:41

42

مَا سَلَكَكُمْ فِى سَقَرَ

تمہیں دوزخ میں کس چیز نے ڈاﻻ.

لنک 74:42

43

قَالُوا۟ لَمْ نَكُ مِنَ ٱلْمُصَلِّينَ

وه جواب دیں گے کہ ہم نمازی نہ تھے.

لنک 74:43

44

وَلَمْ نَكُ نُطْعِمُ ٱلْمِسْكِينَ

نہ مسکینوں کو کھانا کھلاتے تھے.^[1]

حواشی

[1] نماز حقوق اللہ میں سے اور مساکین کو کھانا کھلانا حقوق العباد میں سے ہے مطلب یہ ہوا کہ ہم نے اللہ کے حقوق ادا کیے نہ بندوں کے۔

لنک 74:44

45

وَكُنَّا نَخُوضُ مَعَ ٱلْخَآئِضِينَ

اور ہم بحﺚ کرنے والے (انکاریوں) کا ساتھ دے کر بحﺚ مباحثہ میں مشغول رہا کرتے تھے.^[1]

حواشی

[1] یعنی کج بحثی اور گمراہی کی حمایت میں سرگرمی سے حصہ لیتے تھے۔

لنک 74:45

46

وَكُنَّا نُكَذِّبُ بِيَوْمِ ٱلدِّينِ

اور روز جزا کو جھٹلاتے تھے.

لنک 74:46

47

حَتَّىٰٓ أَتَىٰنَا ٱلْيَقِينُ

یہاں تک کہ ہمیں موت آگئی.^[1]

حواشی

[1] یقین کے معنی موت کے ہیں، جیسے دوسرے مقام پر ہے۔ واعبد ربک حتی یاتیک الیقین» (الحجر: 99)

لنک 74:47

48

فَمَا تَنفَعُهُمْ شَفَـٰعَةُ ٱلشَّـٰفِعِينَ

پس انہیں سفارش کرنے والوں کی سفارش نفع نہ دے گی.^[1]

حواشی

[1] یعنی جو صفات مذکورہ کا حامل ہوگا، اسے کسی کی شفاعت بھی فائدہ نہیں پہنچائے گی، اس لئے کہ کفر کی وجہ سے محل شفاعت ہی نہیں ہوگا، شفاعت تو صرف ان کے لئے مفید ہوگی جو ایمان کی وجہ سے شفاعت کے قابل ہونگے۔اللہ کی طرف سے شفاعت کی اجازت بھی انہی کے لئے ملے گی نہ کہ ہر ایک کے لئے۔

لنک 74:48

49

فَمَا لَهُمْ عَنِ ٱلتَّذْكِرَةِ مُعْرِضِينَ

انہیں کیا ہو گیا ہے؟ کہ نصیحت سے منھ موڑ رہے ہیں.

لنک 74:49

50

كَأَنَّهُمْ حُمُرٌۭ مُّسْتَنفِرَةٌۭ

گویا کہ وه بِدکے ہوئے گدھے ہیں.

لنک 74:50

51

فَرَّتْ مِن قَسْوَرَةٍۭ

جو شیر سے بھاگے ہوں.^[1]

حواشی

[1] یعنی یہ حق سے نفرت اور اعراض کرنے میں ایسے ہیں جیسے وحشی، خوف زدہ گدھے، شیر سے بھاگتے ہیں جب وہ ان کا شکار کرنا چاہیے۔قسورۃ'بمعنی شیر بعض نے تئر انداز معنی بھی کئے ہیں ۔

لنک 74:51

52

بَلْ يُرِيدُ كُلُّ ٱمْرِئٍۢ مِّنْهُمْ أَن يُؤْتَىٰ صُحُفًۭا مُّنَشَّرَةًۭ

بلکہ ان میں سے ہر شخص چاہتا ہے کہ اسے کھلی ہوئی کتابیں دی جائیں.^[1]

حواشی

[1] یعنی ہر ایک کے ہاتھ میں اللہ کی طرف سے ایک ایک کتاب مفتوح نازل ہو جس میں لکھا ہو کہ محمد (صلی اللہ علیہ وسلم) اللہ کے رسول ہیں۔ بعض نے اس کا مفہوم یہ بیان کیا ہے کہ بغیر عمل کے یہ عذاب سے چھٹکارہ چاہتے ہیں، یعنی ہر ایک کو پروانہ نجات مل جائے۔ (ابن کثیر)

لنک 74:52

53

كَلَّا ۖ بَل لَّا يَخَافُونَ ٱلْـَٔاخِرَةَ

ہرگز ایسا نہیں (ہوسکتا بلکہ) یہ قیامت سے بے خوف ہیں.^[1]

حواشی

[1] یعنی ان کے فساد کی وجہ سے ان کا آخرت پر عدم ایمان اور اس کی تکذیب ہے جس نے انہیں بےخوف کر دیا ہے۔

لنک 74:53

54

كَلَّآ إِنَّهُۥ تَذْكِرَةٌۭ

سچی بات تو یہ ہے کہ یہ (قرآن) ایک نصیحت ہے.^[1]

حواشی

[1] لیکن اس کے لئے جو اس قرآن کے واعظ اور نصیحت سے عبرت حاصل کرنا چاہے۔

لنک 74:54

55

فَمَن شَآءَ ذَكَرَهُۥ

اب جو چاہے اس سے نصیحت حاصل کرے.

لنک 74:55

56

وَمَا يَذْكُرُونَ إِلَّآ أَن يَشَآءَ ٱللَّهُ ۚ هُوَ أَهْلُ ٱلتَّقْوَىٰ وَأَهْلُ ٱلْمَغْفِرَةِ

اور وه اس وقت نصیحت حاصل کریں گے جب اللہ تعالیٰ چاہے^[1] ، وه اسی ﻻئق ہے کہ اس سے ڈریں اور اس ﻻئق بھی کہ وه بخشے.^[2]

حواشی

[1] یعنی اس قرآن سے ہدایت اور نصیحت اسے ہی حاصل ہوگی جسے اللہ چاہے گا۔ [2] یعنی وہ اللہ ہی اس لائق ہے اس سے ڈرا جائے اور وہی معاف کرنے کے اختیارات رکھتا ہے۔ اس لئے وہی اس بات کا مستحق ہے کہ اس کی اطاعت کی جائے اور اسکی نافرمانی سے بچا جائے تاکہ انسان اس کی مغفرت و رحمت کا سزاوار قرار پائے۔

لنک 74:56

سورہ المدثر (چادر اوڑھنے والے)