Sura An-Naba kwa Kiswahili: tafsiri, Kiarabu na sauti

1

عَمَّ يَتَسَآءَلُونَ

WANAULIZANA nini? ^[1]

Maelezo ya chini

[1] Wanaulizana nini hao makafiri?

Kiungo 78:1

2

عَنِ ٱلنَّبَإِ ٱلْعَظِيمِ

Ile khabari kuu! ^[2]

Maelezo ya chini

[2] Wanaulizana khabari kubwa, khabari ya kufufuliwa,

Kiungo 78:2

3

ٱلَّذِى هُمْ فِيهِ مُخْتَلِفُونَ

Ambayo kwayo wanakhitalifiana. ^[3]

Maelezo ya chini

[3] Ambayo wao wamezama ndani yake kukhitalifiana baina ya wenye kuikataa na wenye kuitilia shaka.

Kiungo 78:3

4

كَلَّا سَيَعْلَمُونَ

La! Karibu watakuja jua. ^[4]

Maelezo ya chini

[4] Kuwazuia kuulizana huko wanaambiwa kuwa watakuja ujua ukweli wa mambo hapo watapo ona kufufuliwa kumetokea khasa.

Kiungo 78:4

5

ثُمَّ كَلَّا سَيَعْلَمُونَ

Tena la! Karibu watakuja jua. ^[5]

Maelezo ya chini

[5] Tena kuwazuia, watakuja jua itapo wateremkia adhabu.

Kiungo 78:5

6

أَلَمْ نَجْعَلِ ٱلْأَرْضَ مِهَـٰدًۭا

kaKwani hatukuifanya ardhi ma tandiko? ^[6]

Maelezo ya chini

[6] Kwani wao hawaoni Ishara za uweza wetu kwamba Sisi tumeifanya ardhi imetandikwa upatikane utulivu juu yake na iwezekane kutembea juu yake?

Kiungo 78:6

7

وَٱلْجِبَالَ أَوْتَادًۭا

kama Na milima vigingi? ^[7]

Maelezo ya chini

[7] Na tukaifanya milima ni vigingi vya ardhi vya kuituliza? Sehemu ya gamba gumu lilio juu ya ardhi linfikilia kiasi ya kilomita 60 unene wake, na inazidi mikunjo, mifimbi, inapanda juu kuwa milima, na huteremka chini kuwa ni vina vya bahari; na hiyo hulingana kwa sababu ya uzito unao patikana kutokana na milima. Na kulingana huko hakuharibiki ila kwa kubugunyika, kwani gamba kavu la ardhi linazuiliwa na milima, kama vigingi vinavyo zuilia khema. (Rejea Maoni ya Wataalamu juu ya Aya 7 ya Surat Qaf).

Kiungo 78:7

8

وَخَلَقْنَـٰكُمْ أَزْوَٰجًۭا

Na tukakuumbeni kwa jozi? ^[8]

Maelezo ya chini

[8] Na tukakuumbeni kwa jozi, wanaume na wanawake?

Kiungo 78:8

9

وَجَعَلْنَا نَوْمَكُمْ سُبَاتًۭا

Na tukakufanya kulala kwenu ni mapumziko? ^[9]

Maelezo ya chini

[9] Na tukafanya kulala kwenu ni mapumziko ya machofu ya kazi? Kulala usingizi ni kusita nishat'i ya sehemu ya ubongo yenye kutambua na kuwa macho. Yaani gamba la ubongo, au kupunguka nishat'i yake kwa wingi, ukilinganisha na daraja za nishat'i ya sehemu za viungo vilio baki. Na kwa hivyo kunapunguka nguvu na joto la mwili, tena mwili hapo wakati wa usingizi hupata kutua na kupumzika baada ya kuhangaika viungo au akili au vyote viwili. Basi kazi za kimwili zote hupunguka isipo kuwa kazi za kusaga chakula, na kupitisha mkojo katika mafigo, na kutoka majasho katika ngozi, kwani yakisita hayo hupatikana madhara juu ya maisha ya mtu. Ama kuvuta pumzi huko nako hupunguka, na huwa ni kwa ndani zaidi, na huwa kwa kifua zaidi kuliko kwa tumbo. Na mpigo wa mishipa hupungua kasi kwa kunavyo tokana na moyo, na hudhoofika mkazano wa musulo (muscular tension), na kwa hivyo huwa taabu kupata harakati za kinyume. Na yote haya ni ili binaadamu apate kupumzika wakati wa kulala.

Kiungo 78:9

10

وَجَعَلْنَا ٱلَّيْلَ لِبَاسًۭا

Na tukaufanya usiku ni nguo? ^[10]

Maelezo ya chini

[10] Na tumeufanya usiku ni sitara kwenu kwa kiza kinacho kufunikeni.

Kiungo 78:10

11

وَجَعَلْنَا ٱلنَّهَارَ مَعَاشًۭا

Na tukaufanya mchana ni wa kuchumia maisha? ^[11]

Maelezo ya chini

[11] Na tumeufanya mchana ni wakati wa kuhangaika kwenu kutafuta cha kukusaidieni katika maisha yenu.

Kiungo 78:11

12

وَبَنَيْنَا فَوْقَكُمْ سَبْعًۭا شِدَادًۭا

Na tukajenga juu yenu saba zenye nguvu? ^[12]

Maelezo ya chini

[12] Na tumesimamisha juu yenu mbingu saba zenye nguvu madhubuti.

Kiungo 78:12

13

وَجَعَلْنَا سِرَاجًۭا وَهَّاجًۭا

Na tukaifanya taa yenye mwanga na joto; ^[13]

Maelezo ya chini

[13] Na Sisi tumeliumba jua lenye mwangaza na linalo waka. Makusudio ya Assiraj Alwahhaaj, Taa yenye mwanga na joto, ni Jua. Na hayo kama ilivyo thibiti katika sayansi kuwa daraja ya joto la uso wake inafika daraja 6000. Ama kati yake daraja yake inazidi daraja 30 milioni kwa sababu ya mdidimizo mkubwa unao patikana juu ya madda ziliomo ndani yake. Na jua linatoa nishat'i hizi zifuatazo: 9 katika 100 ya miale ya Ultraviolet rays, 46 katika 100 ya miale ya mwangaza, 45 katika 100 miale ya joto, au Infra red rays. Na kwa hivyo hii Aya tukufu imeliita kuwa ni Taa yenye mwangaza na joto.

Kiungo 78:13

14

وَأَنزَلْنَا مِنَ ٱلْمُعْصِرَٰتِ مَآءًۭ ثَجَّاجًۭا

Na tukateremsha maji yanayo anguka kwa kasi kutoka mawinguni, ^[14]

Maelezo ya chini

[14] Na tumeteremsha kutokana na mawingu yaliyo karibia kunyesha maji yenye kumiminika kwa nguvu. Mvua ndio kitu pekee kinacho toka asli yake maji matamu katika ardhi. Na asli ya mvua ni kukusanyika vijisehemu vya maji yanayo panda kutoka baharini, na maziwa na mito, yakakusanyika kama mawingu na yakageuka chembe za mvua au vipande vya barafu, na khatimaye yakaanguka kwa sura ya mvua au theluji.

Kiungo 78:14

15

لِّنُخْرِجَ بِهِۦ حَبًّۭا وَنَبَاتًۭا

Ili tutoe kwayo nafaka na mimea. ^[15]

Maelezo ya chini

[15] Ili tutoe kwa maji haya nafaka na mimea kuwa ni chakula kwa ajili ya watu na wanyama.

Kiungo 78:15

16

وَجَنَّـٰتٍ أَلْفَافًا

Na mabustani yenye miti iliyo kamatana. ^[16]

Maelezo ya chini

[16] Na mabustani yenye miti iliyo fungamana na matawi yake yameingiliana.

Kiungo 78:16

17

إِنَّ يَوْمَ ٱلْفَصْلِ كَانَ مِيقَـٰتًۭا

Hakika siku ya uamuzi imewekewa wakati wake, ^[17]

Maelezo ya chini

[17] Hakika siku ya uamuzi baina ya viumbe imewekewa miadi ilio kwisha kadiriwa kwa ajili ya kufufuliwa.

Kiungo 78:17

18

يَوْمَ يُنفَخُ فِى ٱلصُّورِ فَتَأْتُونَ أَفْوَاجًۭا

Siku litapo pulizwa barugumu, nanyi mtakuja kwa makundi, ^[18]

Maelezo ya chini

[18] Siku litakapo pulizwa barugumu na kufufuliwa watu, mtakuja kwenye mkutano makundi kwa makundi.

Kiungo 78:18

19

وَفُتِحَتِ ٱلسَّمَآءُ فَكَانَتْ أَبْوَٰبًۭا

Na mbingu zitafunguliwa, ziwe milango. ^[19]

Maelezo ya chini

[19] Na mbingu zitapasuliwa kila upande hata zitakuwa ni milango milango.

Kiungo 78:19

20

وَسُيِّرَتِ ٱلْجِبَالُ فَكَانَتْ سَرَابًا

Na milima itaondolewa na itakuwa kama sarabi. ^[20]

Maelezo ya chini

[20] Na milima itaondolewa baada ya kung'olewa mwahala mwake, na kuvurugwa, ikawa unaiona kama sura ya milima na hali hiyo ni kifusi tu kilicho rindikwa, kama uonavyo mangati, sarabi, unaona kama sura ya maji nayo si maji.

Kiungo 78:20

21

إِنَّ جَهَنَّمَ كَانَتْ مِرْصَادًۭا

Hakika Jahannamu inangojea! ^[21]

Maelezo ya chini

[21] Hakika Jahannamu imekuwa kama ni kitu kinacho ngojea, walinzi wake wanawangojea watu watakao kuja kuingia.

Kiungo 78:21

22

لِّلطَّـٰغِينَ مَـَٔابًۭا

Kwa walio asi ndio makaazi yao, ^[22]

Maelezo ya chini

[22] Yawe ni marejeo na mafikio kwa wenye kupindukia mipaka ya Mwenyezi Mungu.

Kiungo 78:22

23

لَّـٰبِثِينَ فِيهَآ أَحْقَابًۭا

Wakae humo karne baada ya karne, ^[23]

Maelezo ya chini

[23] Watakaa humo dahari baada ya dahari.

Kiungo 78:23

24

لَّا يَذُوقُونَ فِيهَا بَرْدًۭا وَلَا شَرَابًا

Hawataonja humo chochote kibaridi wala kinywaji, ^[24]

Maelezo ya chini

[24] Hawataonja humo hata chembe ya upepo wa kuburudisha joto lake, wala kinywaji cha kupoza kiu chao.

Kiungo 78:24

25

إِلَّا حَمِيمًۭا وَغَسَّاقًۭا

Ila maji yamoto sana na usaha, ^[25]

Maelezo ya chini

[25] Lakini watakunywa maji yalio pita ukomo kwa umoto wake, na usaha unao miminika kutokana na ngozi za watu wa Motoni.

Kiungo 78:25

26

جَزَآءًۭ وِفَاقًا

Ndio jaza muwafaka. ^[26]

Maelezo ya chini

[26] Malipo ya kuwafikiana na vitendo vyao viovu.

Kiungo 78:26

27

إِنَّهُمْ كَانُوا۟ لَا يَرْجُونَ حِسَابًۭا

Hakika hao hawakuwa wakitaraji kuwa kuna hisabu. ^[27]

Maelezo ya chini

[27] Kwani hao hawakutaraji kuwa itakuwapo kuhisabiwa, hata watende ya kuwaokoa humo.

Kiungo 78:27

28

وَكَذَّبُوا۟ بِـَٔايَـٰتِنَا كِذَّابًۭا

Na wakikanusha Aya zetu kwa nguvu. ^[28]

Maelezo ya chini

[28] Wakazikadhibisha Ishara za Mwenyezi Mungu zenye kuthibitisha kufufuliwa kwa mkadhibisho mkali.

Kiungo 78:28

29

وَكُلَّ شَىْءٍ أَحْصَيْنَـٰهُ كِتَـٰبًۭا

Na kila kitu Sisi tumekidhibiti kwa kukiandika. ^[29]

Maelezo ya chini

[29] Na kila kitu tumekidhibiti kwa kukiandika.

Kiungo 78:29

30

فَذُوقُوا۟ فَلَن نَّزِيدَكُمْ إِلَّا عَذَابًا

Basi onjeni! Nasi hatutakuzidishieni ila adhabu! ^[30]

Maelezo ya chini

[30] Basi onjeni, wala hampati kwetu ila kuzidishiwa adhabu tu.

Kiungo 78:30

31

إِنَّ لِلْمُتَّقِينَ مَفَازًا

Hakika wachamngu wanastahiki kufuzu, ^[31]

Maelezo ya chini

[31] Hakika wenye kumcha Mola wao Mlezi watapata kuokoka na adhabu, na wataipata Pepo,

Kiungo 78:31

32

حَدَآئِقَ وَأَعْنَـٰبًۭا

Mabustani na mizabibu, ^[32]

Maelezo ya chini

[32] Na mabustani yenye matunda, na mizabibu mizuri,

Kiungo 78:32

33

وَكَوَاعِبَ أَتْرَابًۭا

Na wake walio lingana nao, ^[33]

Maelezo ya chini

[33] Na wanawari walio watipwatipwa wa hirimu yao,

Kiungo 78:33

34

وَكَأْسًۭا دِهَاقًۭا

Na bilauri zilizo jaa, ^[34]

Maelezo ya chini

[34] Na bilauri safi zilizo jaa pomoni,

Kiungo 78:34

35

لَّا يَسْمَعُونَ فِيهَا لَغْوًۭا وَلَا كِذَّٰبًۭا

Hawatasikia humo upuuzi wala uwongo, ^[35]

Maelezo ya chini

[35] Hawasikii huko Peponi upuuzi wala uwongo.

Kiungo 78:35

36

جَزَآءًۭ مِّن رَّبِّكَ عَطَآءً حِسَابًۭا

Malipo kutoka kwa Mola wako Mlezi, kipawa cha kutosha. ^[36]

Maelezo ya chini

[36] Ni malipo kutokana na Mola wako Mlezi, kwa fadhila yake na ihsani ya kutosha.

Kiungo 78:36

37

رَّبِّ ٱلسَّمَـٰوَٰتِ وَٱلْأَرْضِ وَمَا بَيْنَهُمَا ٱلرَّحْمَـٰنِ ۖ لَا يَمْلِكُونَ مِنْهُ خِطَابًۭا

Mola Mlezi wa mbingu na ardhi na vilio baina yao, Arrahman, Mwingi wa rehema; hawamiliki usemi mbele yake! ^[37]

Maelezo ya chini

[37] Mola Mlezi wa mbinguni na duniani na vilio baina yao, ambaye rehema yake imeenea juu ya kila kitu. Hapana yeyote mwenye madaraka ya kusema mbele yake.

Kiungo 78:37

38

يَوْمَ يَقُومُ ٱلرُّوحُ وَٱلْمَلَـٰٓئِكَةُ صَفًّۭا ۖ لَّا يَتَكَلَّمُونَ إِلَّا مَنْ أَذِنَ لَهُ ٱلرَّحْمَـٰنُ وَقَالَ صَوَابًۭا

Siku atakapo simama Roho na Malaika kwa safu. Hawatasema ila Mwingi wa rehema aliye mruhusu, na atasema yaliyo sawa tu. ^[38]

Maelezo ya chini

[38] Siku atakapo simama Jibrili na Malaika walio teuliwa nao wamenyenyekea, hasemi mmoja wao ila akipewa idhini na Arrahman, Mwingi wa rehema, kuwa aseme, naye atasema lilio sawa tu.

Kiungo 78:38

39

ذَٰلِكَ ٱلْيَوْمُ ٱلْحَقُّ ۖ فَمَن شَآءَ ٱتَّخَذَ إِلَىٰ رَبِّهِۦ مَـَٔابًا

Hiyo ndiyo Siku ya haki. Basi anaye taka na ashike njia arejee kwa Mola wake Mlezi ^[39]

Maelezo ya chini

[39] Hiyo ndiyo siku isiyo na shaka. Basi atakaye na ashike njia ya kwenda kwa Mola wake Mlezi arejee kwa Imani, na a'mali njema.

Kiungo 78:39

40

إِنَّآ أَنذَرْنَـٰكُمْ عَذَابًۭا قَرِيبًۭا يَوْمَ يَنظُرُ ٱلْمَرْءُ مَا قَدَّمَتْ يَدَاهُ وَيَقُولُ ٱلْكَافِرُ يَـٰلَيْتَنِى كُنتُ تُرَٰبًۢا

Hakika tumekuhadharisheni adhabu iliyo karibu kufika; Siku ambayo mtu atakapo ona yaliyo tangulizwa na mikono yake; na kafiri atasema: Laiti ningeli kuwa udongo! ^[40]

Maelezo ya chini

[40] Hakika Sisi tumekuhadharisheni na adhabu itakayo tokea karibu, siku atakapo angalia mtu vitendo vyake vilivyo tangulizwa na mikono yake, na atakapo sema kafiri kwa kutamani kuokoka: Laiti ningeli bakia udongo baada ya kufa, nisifufuliwe wala nisihisabiwe!

Kiungo 78:40

Sura An-Naba (Habari Kubwa)